Kamis, 08 Desember 2011

Datu Dalu & Sahang Maima

Parbadaan ni Datu Dalu dohot Sahang Maima
Najolo adong ma dua halak na marhahamaranggi na tading di sada huta, na sihahaan margoar Datu Dalu jala sianggian margoar Sahangmaima. Di na sahali dipauli Sahangmaima ma sada porlak, di suan ma di porlakna i gadong. Alai ro ma aili (wakka) manguge gadong i, ala ni i diinjam ma sada hujur sian Datu Dalu. Ia hujur i hujur homitan ompu nasida do i. 
Di na laho mangalehon hujur i Datu Dalu, didok ma:

Tung na so jadi mago hujur i !

Dung i dipantomhon Sahangmaima ma hujur i tu na manguge gadong i, hona ma pargisihan ni aili i, laos lohot ma mata ni hujur i disi, alai tinggal do anggo totoranna (hauna). Mangihuthon baritana, ianggo aili i maporus do tu banua toru jala laos lohot ma mata ni hujur i di daging ni aili i. Dung leleng so di paulak Sahangmaima hujur i. Marnida i ro ma Datu Dalu mangido hujur inon.

Datu Dalu:
”Boasa songon i leleng tioponmu hujur i ? Ai ugasan hatopan do i ! ”

Sahangmaima:
“Olo tutu do i, alai holan hauna nama dison ! Taihut do anggo matana tu aili na hupantom i. Hupatopahon nama singkat ni mata ni hujur i”

Datu Dalu:
“ Ah, ndang boi songon i, ingkon matani hujur i do mulak. Adat ni panginjamon, ia i barang na diinjam, ba laos i ma paulahon! Asa ingkon hujur na diinjammu i do paulahonmu.”

Sahang Maima:
 “ Adat ni ompunta ro di amanta : Aek na litok tingkiron tu julu, hori na rundut tingkiron tu rompean  ba, ndada toishu mangagohon hujur i, na hurang momos hian do. Ba aut sura pe i, boi do singkatan na so disi ! Ndada sisik nilangkophon, imbulu sinuanhon ho tu au. Hudok pe songon i, manang dia pandokmu singkat silehononku, olo do ahu , asal unang marbada hita, ai do adat ni pardongan sabutuhaon:

Ijur tarbirsak, pat tardege, tongka masipaihutihutan” 

 Datu Dalu:
“ Ndang boi singkat, ingkon hujur i do paulahonmu, “ 

Dung i sai marsak ma roha ni Sahangmaima, ala so boi jumpang mata ni hujur i di rohana; ai nunga di boan aili tu banua toru. Alani i diharahon ma donganna mambuat hotang tu tombak, dung godang hotang i, i ma dibahen nasida tali tantanni Sahangmaima martuat tu banua toru. Dung sahat ibana ro di banua toru, ditopot ibana ma sada huta disi, laho ma ibana hundul tu tarisopo na di huta i. Adong ma diida boruboru pangisi ni huta i na manduda di jolo ni sopo i. Ala i ro ma manuk mamarguti eme ni boruboru i, gabe ditullangkon boruboru i ma andaluna tu manuk i, hona ma jala pola magotap rungkung ni manuk i. Jadi muruk ma nampuna manuk i tu boruboru i, jala songononmapakkataion ni nasida.

Nampuna manuk:
“ E, ndang jadi mate ale, manuknami i, anggo ememu i hu singkat pe i.”


Panduda:
“ Denggan ! Alai manukku on ma singkatna tu ho, ai na mangolu do singkatni na mangolu ” 

Nampuna manuk:
“ Ndang ale, ingkon manukhu i do na mulak mangolu tu ahu, ” 

Umbege i marsak ma rohani panduda i gabe mangalu-alu ma ibana tu Sahangmaima. Alani i asi ma rohani Sahang Maima, songon arsakni rohangku do arsak ni rohana, ninna rohana dibagasan. Jadi didok Sahangmaima ma tu panduda i hatana lao mangalusi.

Sahang Maima:

“ Ale inang, molo dipatuduhon hamu na hulului on, boi do tarpangolu ahu manuk na binunumuna i ! ”

Panduda:
“ Ba aha ma huroha ?” 

Sahang Maima:
”Hupantom aili di banua tonga laos tarihut mata ni hujur i tu aili i. On pe molo diida hamu i paboa hamu ma ! ”


Panduda:
“Adong do amang boruboru mabugang di jabu an, na ro sian banua tonga, sai peak do ibana jala laos lohot dope basir dibugangna i nuaeng ” 


Sahang Maima:
“Ndang jolma dainang, na hutullang i, aili do ”

Panduda:
”O, ale amang, tung na jahat do i, tarbahen i do rupana mimbarimbar naeng manangko suansuananni halak, i pe disi do hujurmu i”.

Sahang Maima:
” Ba beha ma i bahenonta inang, mambuat i ? ”

Panduda:

” Ba pangolu ma jolo manuk na mate on, idaonni amani na mabugang i ma annon gabe dokkononna ma hamuna mangubati boruna i.”

Tongon tahe ninna roha ni Sahang Maima, gabe dibahen ma taoarna taoar pangabangabang taoar pangubungubung; sipangolu naung mate siparata naung busuk tu manuk i, jadi mulak mangolu ma manuk i tutu. Dipaulak boru panduda i ma manuk i tu nampunasa. Dung i tarbarita ma hadatuonni Sahangmaima di sandok banua toru, gabe dibege amani na mabugang i ma i. Dijou ma Sahang Maima mangubati boruna na mabugang i.

Jadi diparose Sahang Maima ma bugang i, nunga polpol tutu matani hujur i dibugangna i. Dung i diarit Sahang aima ma tandang suman ni matani hujur i. Bornginna i ditogihon ma na mabugang i tu lambung ni lubang-lubang, asa enetonna matani hujur i di rohana. Dipaula-ula dipandekdekhon pulung-pulungan ni ubatni na mabugang i, jala sai disuru ma isi ni jabu i mangalap tu bara, asa unang adong marnida enetonna matani hujur i di rohana. Andorang di toruni isini jabu i, dienet ma matani hujur i jala disolothon tu gontingna. Dipatuduhon ma tandiang sumanni matani hujur i tu parboru i, huhut ma didok:

Ah, na torbang do ganjang ni suga on, leak do songon i hansit dihilala!

Jadi las ma rohani parboru i, ai malum ma dirohana bugangni boruna i.
Hape tubu ma dipingkiranni parboru i songon on:

Pinangan ma Sahangmaima on asa binuat taoarna i.

Alai mamoto do roha ni Sahangmaima di tahi ni roha ni parboru i. Jadi andorang nok matana, hehe ma Sahangmaima mijur tu toru, alai diboan ibana ma sipu-sipu jala dipaula ma mangalului pulung-pulungan. Dung i di rahuthon ma sipusipu i tu ihur ni babi na modom di bara ni jabu i. Laho muse ma Sahangmaima tu alaman, di pajongjong ma disi gaol suman ni jolma. Ditali ma borong-borong jala ditambathon ma tu harbangan ni huta i, dipambahen ma dohot rambang-rambang. Dung i pintor manaek ma ibana tu hotang hamijuranna i.
Dung tarsunggul ama ni boruboru i, di parose ma di jabu i, hape ndang disi be Sahangmaima. Mijur ma ibana tu toru mangalului Sahangmaima, diida ma adong api dibara jadi didapothon ma tusi, ai dirimpu do disi Sahangmaima. Ditampulhon ma podangna, hape babi do hona laos mate. Dibereng tu alaman diida songon na adong jolma jongjong disi, jadi dilojong ma i jala ditampulhon podangna, pintor peak ma na tinampulna i, jala manigor diharat ma i, ala ni murukna, alai ngalingali do, ai batang ni gaol do i antong.
Dibege ma parngung-ngungung ni borong-borong dingkan harbangan jadi didapothon ma tusi, ai dirimpu ma i Sahangmaima, gabe maralitan ma ibana tu rambang-rambang i. Asa angkal ni Sahangmaima do na binahenna i, unang sanga eahan ni parboru i ibana di rohana.
Sian jut ni roha ni parboru i, diboan ma pitu asuna mangeahi Sahangmaima, alai nunga dao ibana manjangkit, jadi dijou parboru i ma ibana, didok ma:

Ale Sahangmaima, paima ahu, adong do saotik sidohononku tu ho”.

Umbege i dipagogo Sahangmaima ma manjangkit, dung lam jonok pangeahi i, digotap Sahangmaima ma hotang panjangkitanna i dingkan toruna, jadi matos ma, gabe madabu ma pangeahi i rap dohot onom biangna i. Alai sada sian biangna i margoar ”sampagatua” sanga do ibana manaek tu ginjang, mangihuthon pandok ni parturiturian, biang i do na mangutahon sahit sampusampu di banua tonga on. I do alana umbahen tar di painumhon halak mudar ni biang nambura, na sineat tu halak na sampusampuon.

Ia dung sahat Sahangmaima ro di hutana, dipaulak ma matani hujur i tu Datu Dalu. Alai sai gotos do rohana dipambahenan ni Datu Dalu i. Dipudian ni ari, dibahen Sahangmaima ma porlakna dilambung dalanni Datu Dalu, disuani ibana ma gaol diporlakna i. Di na sadari, marhorja ma Datu Dalu, jadi diharahon niolina ma donganna mangalap aek, tar holang do mual i sian huta. Alai di na mulak nasida sian pangalapan aek i, por ma udan, ditinggang ma nasida. Jadi dibuat nasida ma bulung gaolni Sahangmaima, bahen saong nasida.
Diboto Sahangmaima ma i, gabe ditopot ma nioli ni Datu Dalu.

Sahang Maima:

”Paulak bulung ni gaolhu i tu pambuatanmu, alai ndang jadi malos, ingkon sumuang do sian partubuna hian.”

Didok Sahangmaima ma huhut:
”Ndang boi singkat ali ni na mago, ia mas binuat, ingkon laos mas i do paulakon".

Datu Dalu:
”Ba, ia i daba, sumuan bulu do ho di lapanglapangni babi, umpungka na so uhum do ho marmulahon na so jadi. Ia i parsingiran, i do nian partungguan! Ahu do alom, hape tu ina do naeng sudolhononmu. Molo uhum sintong do i juap ma hita manguji; alai molo na gurgur do i sian uhum, lompo sian patik, ho na ripe talu, na ripe monang ma hami tumpahon ni ompu parsadaanta i.”

Sahang Maima:
‘Ba na so patut do ba pandokmu i, ai didok ompunta sijolojolo tubu: ”Ia duri sinuan, duri do dapoton, ho do na mandok, ndang boi singkat ali na mago, ba laos songon na binahenmu i do na hubahen tu ho, gabe sogo do roham.
Uhum sontong do i pandokmu i, juap (ndang talu ndang monang) hita manguji, alai anggo geduk na binahenmu i talu ma ho jala tullangon ni hujur buaton ni bodil. Tangihon ma pangkuling ni ompunta sisada pinggol on, na tangis so apulon na maila so dapotan on!”

Dung i masibodilan ma nasida pitu ari pitu borngin, juap do, ndang adong na talu. Dipahabang Datu Dalu ma losungna tu huta ni Sahangmaima, jala dipahabang Sahangmaima ma aek di bagas tabutabu tu huta ni Datu dalu, martaha ma i diginjang andorang so sahat tu tano, dung madabu tu tano gabe ma i dua ambar.

Didok Barita Naasing:
Rasirasa nuaeng, molo binuat aek sian ambar na dua i, jala binahen tu sada hudon, gunsang do aek i ala maralo. Asa marbingkas sian i ma parsalisiannasida, ala ni i ma gabe marserak pinomparnasida.

H O R A S
___Sakti Madingin___

Tidak ada komentar:

Posting Komentar