Ia Raja Biak-biak, margoar di huhut Raja
Gummeleng-geleng na songon gumul do ibana ndang martangan, ndang marpat jala so
boi hundul. Ibana do na lumea di bagasan ohana, ala so martihas angka anggina.
Mangihuthon baritana : Ro do sahali Mulajadi Nabolon,
tuat tu Sianjur Mulamula sorang tu Guru Tateabulan mangunjuni rohana, ai
dipangido ma anakna Sariburaja seatonna.” Ba saguru di ho do Ompung!” ninna
Guru Tateabulan mangalusi.
Umbege I, didok Raja Biak-biak ma tu inana : “O inang!
Hubege dioloi amanta nangkining seaton ni ompunta Mulajadi Nabolon si
Sariburaja, ianggo di rohangku, ahu do na naeng seatonna, ai aha ma ahu
martimbangkon Sariburaja na so martihas I?. Asa ianggo siat pangidoanku suru ma
damang manabunihon ahu, ai atik pe songon on partubungku ahu do sipultak
bajubajumu!”.
Umbege hata ni Raja Biak-biak inana I, disuruma Guru
Tateabulan manabunihon Raja Biak-biak tu Dolok Pusukbuhit.
Dung nangkok Mulajadi
Nabolon tu bagas, dipangido ma Sariburaja seatonna. Jadi di lehon inana i ma.
Didok Mulajadi nabolon ma : ” Tiop ma patna i!”, jadi di tiop ma tutu. Dung i
diseat ma jala ditanggoi.Nungan di hodohon hian pangalompaanna. Ia dung sidung
di anggoi dipambahen ma tu pangalompaanna i asa pamasahonna.Dung ro di
pangalompaanna i, manggora ma Mulajadi nabolon didok ma :” Na olo gabe
Sariburaja, ruar ma ho sian i!”, jadi mangangkat ma tutu Sariburaja sian i,
laos hundul ma ibana tu halangulu. Nungan songon Garaga ibana, songon Garugu,
na sada songon na pitupulu.
Mangihuthon pandok ni na deba, sian angka na tinggal i
laos manjadi ma ragam ni pahanpahanan.
Ia di tingki na laho mulak Mulajadi
nabolon tu banua ginjang, sian dolok Pusukbuhit do ibana manaek. Jadi jumpangsa
ma disi Raja Biak-biak : ” Ise na mamboan ho tuson?”, ninna Mulajadi nabolon
manungkun ibana.
” Ianggo i da ompung, na mabiar do ahu di biarhu, matahut di
tahuthu!.
Hubege nangkining diondam ho da Ompung seaton Sariburaja, anggo di
rohangku ahu do na naeng seatonmu, ala na martihas i ahu. Gabe hupangido tu
dainang asa disuru damang manaruhon ahu tuson. Ai ahu do sipultak bajubaju ni
dainang.”
Ba naeng marsomba tu ho di roham angka pinompar ni anggimi dohot
ibotom?”, ninna Mulajadi nabolon.” Naeng ma tutu, ai ahu do sihahaan, ahu do na
patut raja nasida!”, ninna Raja Biak-biak.”
Antong molo songon i, beha, olo do ho tumpaonku?”
”Ba olo do ahu, asal ma marsomba tu ahu angka pinompar
ni anggingku dohot ibotongku!”, ninna raja Biak-biak.
Jadi di tumpa Mulajadi Nabolon ma Raja Biak-biak di
dolok Pusukuhit i. Gabe, marpat, martangan, alai songon munsung babi (santabi)
do munsung na.Mangihuthon pandok ni na deba marhabong do ibana. Di bahen ma
goarna Tuan Raja Uti, raja na so ra mate, raja na so ra matua.
Sian punsu ni
dolok Pusukbuhit I, dipahabang Mulajadi Nabolon ma ibana tu ujung Aceh.
SUMBER:
BUKKU W.M HUTAGALUNG 1926.
HORAS.
Catatan:
Ini sekilas Cerita-Kisah yang ditulis WM. Huta Galung, kisah ini sangat ringkas dan padat, kisah lengkapnya di tulis di blog:
Tidak ada komentar:
Posting Komentar